أقولك ع الفرق بين Armv6 و Armv7 ببساطة ؟؟
أكيد انت عارف المعالج صح ؟ طيب تعرف معالج الكمبيوتر أكيد .. المعالجات بتاعة الكمبيوتر بيكون ليها طريقة بنية اسمها معمارية أو Architecture والبنية دي بتتحكم ف الأداء و استهلاك الطاقة يعني أهم حاجه ف المعالج .. بنية معالجات الكمبيوتر بتكون مبنية علي أساس استهلاك طاقة كبير واخراج حرارة عالي وأداء عالي .. ودي المعالجات الي في جهازي وجهازك .
أما جم يستخدموا معالجات متقدمة ف السمارت فونز قابلتهم مشكلة الحرارة واستهلاك الطاقة طبعاً .. جات شركة بريطانية اسمها ARM صممت ( بس وخلي بالك من بس دي ) معمارية جديده وسمتها ARM علي اسمها ودي بتدي أعلي أداء بأقل استهلاك طاقة ودي تقريبا اساس كل السمارت فونز وكل شركات تصنيع المعالجات بتبني علي أساس تصميمات شركة ARM مع بعض التعديلات .
معالجات ARM ليها فيرجنات .. عندك ARMv6 .. دي معمارية قديمة نسبياًً وكانت مستخدمة في الهواتف ما قبل 2009 تقريبا .. ودي كان ترددات المعالجات ميزيدش عن 800 ميجاهرتز .. كانت بتقضي الغرض ساعتها .. أوقات مبتكونش ملحقة بمعالج رسومي .. ما يعني عدم تشغل العاب 3D وحتي لو معاها معالج رسومي أصلا المعالج نفسه ضعيف ولو شغلها هتشتغل ببطأ .. ومعالجات V6 موجوده في هواتف مشهورة زي Galaxy Y و Galaxy Pocket و Galaxy Mini و هواتف اكسبريا القديمة زي X8 و هواتف LG القديمة . حتي المعالجات دي كانت متقدرش تشغل فلاش بلاير في البراوزر .
جات ARM وصممت حاجه جديده وهي Armv7 .. ودي المعمارية الي كل الهواتف بتنزل بيها .. تاخد شركة المعالجات التصميم من أرم وتعدل عليه وتعمل معالج بتقنيات عالية وتنزله في الموبايل .. والمعمارية دي بقت بتشغل فلاش بلاير وبتقبل معالج رسومي وبتشغل ألعاب وتقريبا لو تعرف الفاصل بين Armv7 و 6 شوف موبايل زي Galaxy Mini 2 وموبايل Galaxy Mini .
دلوقتي كلنا مستنيين موبايلات بمعمارية x64 زي الحاسب الي هتكون طفرة فعلية في الهواتف الذكية والي طلعت تسريبات عن استخدامها في Galaxy S5 !
سامعك يالي بتقول اعرف موبايل ارم فيرجن كام ازاي
ببساطة تقدر تنزل برنامج 11 كيلوبايت من الماركت اسمه System info droid .. فيه كل امكانيات هاردوير جهازك ومكتوب فيه المعمارية .. أو ممكن تدخل علي GSMARENA وتعمل سيرش علي موبايلك وهتلاقي مكتوب
منقووووووووووووول
ليست هناك تعليقات:
إرسال تعليق